Локалитет „Манчевци“

Во срцето на стариот Охрид, во близина на „Св. Софија“ и на патот кон Античкиот театар, се наоѓа археолошкиот локалитет „Манчевци“. Тука се откриени остатоци од ранохристијанска базилика од IV–V век, сведоштво за раното ширење на христијанството во Охрид.

Археолошките истражувања започнале во 2007 година, а досега се истражени околу 200 квадратни метри. Особено внимание привлекува добро зачуваниот поден мозаик со декоративни мотиви карактеристични за овој период.

Пронајдени се и фрагменти од фрески и мермерна архитектонска и декоративна пластика. Манчевци е една од деветте познати ранохристијански базилики на подрачјето на Охрид.

Денес конзервираните остатоци и мозаиците му овозможуваат на посетителот директно да допре до еден од најстарите слоеви на историјата на градот.